曼聯新帥考察團頻出動　聯絡4位候選人

雖然曼聯早前決定留用坦哈格，但前題係要坦帥交出成績，曼聯日前歐霸盃作客費倫巴治和局收場，戰術被摩連奴壓制，而且3場歐霸盃都打和，坦哈格交唔到功課，據報曼聯新帥考察團又出動，將會聯絡4名候選人，分別係沙維、魯賓艾摩廉、泰錫同法蘭克。

英國傳媒報道，曼聯新股東拉特克利夫近日指派CEO貝拉達率領新帥考察團出動，佢哋已經同沙維傾過至少2次，而泰錫離開多蒙特後同沙維一樣，仍在待業狀態，兩人都可隨時上任取代坦哈格。

至於魯賓艾摩廉現時執教士砵亭，法蘭克就係賓福特主帥，如果曼聯要搵佢兩個執教就比較麻煩，其中法蘭克今夏曾經同曼聯高層有過對話，其執教風格獲得曼聯管理層欣賞。