夏蘭特「青蛙腳」結束英超入球荒　曼城上榜首

周六晚(26日)英超10點場，曼城主場迎戰修咸頓，憑艾寧夏蘭特開賽5分鐘開紀錄，贏1比0全取3分，趁利物浦未對阿仙奴之前暫時升上榜首，夏蘭特繼上場歐聯「功夫腳」入波後，今場又用「青蛙腳」撞入，結束英超3場入球荒。

「藍月亮」強陣出擊，夏蘭特鋒線拍住菲爾科頓，左右翼係馬菲奧斯紐尼斯同沙維奧，開賽5分鐘就入波，馬菲奧斯紐尼斯左路出波，夏蘭特同碧拿歷克爭位爭贏，門前失平衡倒地前用「青蛙腳」撞入，曼城領先1比0。

夏蘭特自從9月22日對阿仙奴入波後，近3場英超對紐卡素、富咸同狼隊都冇進帳，嚟到今場終於入番波，近7場對升班球隊正選上陣都有入球，係2017年11月阿古路之後第1人，而佢今季英超入球數字累積到11球。

不過曼城領先後想搵個保險球就有啲困難，遲遲未再入波，完半場前幾乎畀甘馬倫阿奇追和，只係該位22歲鋒將射中楣，曼城唔失分算好彩，最終小勝1粒完場。