2失单刀+8次越位　麦巴比打吡噩梦

皇家马德里喺西甲主场惨吞巴塞隆拿4蛋，首次出战“国家打吡”嘅基利安麦巴比，冇贡献之馀仲系输波关键原因。呢位法国前锋今场2次单刀失机，仲录得西甲纪录嘅单场8次越位，所有进攻数据全部“挂零”，演出令球迷失望。

对住巴塞嘅高位防线，麦巴比今场有唔少机会，但佢多次跌落越位陷阱，单系上半场就有6次越位，最后全场有8次越位，系自西甲有纪录以来最高数字，追平艾尔切前锋庄拿泰斯喺2015年嘅越位纪录。皇马教练安察洛堤赛后拒绝怪责麦巴比：“我哋知道巴塞防线企得好前，所以我哋冒险，作为前锋越位系好正常。”

事实上，麦巴比亦有2次成功突破越位单刀，不过两次射门都被门将恩拿斯奥彭拿挡出，埋单计数麦巴比今仗0入波、0助攻、0创造机会、0成功传中同0次制造犯规，皇马惨败麦巴比责无旁贷。