羅拔仔翻生！巴塞再磨最強「三叉戟」

巴塞隆拿向來以進攻見稱，由「美斯+亨利+伊度奧」到「美斯、蘇亞雷斯、尼馬」，都係令後衞聞風喪膽嘅組合，沉淪多年後，今季終於磨出羅拔利雲度夫斯基、拉明耶馬同拉芬夏比洛尼嘅「三叉戟」，3人今季西甲製造入球都超過10球，包辦入球貢獻榜前3名！

羅拔仔上季入球「減產」，令人質疑佢依家36歲嘅佢已走下坡，估唔到呢位波蘭箭頭今季翻生，近5場比賽入10球，依家西甲有14個入波排射手榜榜首，加上2次助攻，今季聯賽已製造16個入球。更恐怖嘅係，喺呢個西甲入球貢獻榜，第2位係拉芬夏比洛尼(6入球+6助攻)、第3位係拉明耶馬(5入波+6助攻)，「三叉戟」雄霸西甲前3名！

數據顯示，巴塞依家11場聯賽入37球，成功打破施丹執教嘅皇家馬德里保持嘅西甲紀錄(11場入36球)。羅拔仔賽後表示：「球季仲有好長嘅路，最重要係有個清晰理念，無論進攻同防守都好好，當大家目標一致，入波就會變得好簡單。」