愛華頓補時4分鐘逼和富咸　功臣變喊包

周日(27日)凌晨英超，愛華頓主場驚濤駭浪下1比1逼和富咸，5場聯賽不敗逐步逃離護級漩渦。葡萄牙前鋒比圖比東卡補時4分鐘為愛華頓入救命波後，即場變「大喊包」，盛傳佢1月將被愛華頓踢走。

愛華頓今場表現麻麻，形勢唔及客隊，富咸喺61分鐘由伊美路維中場策動攻勢，助攻伊禾比推順射入。愛華頓尾段全力反撲，去到補時4分鐘有收穫，後備上陣嘅比圖接應艾舒利楊格傳中頂入，戲劇性追和1比1，比圖入波後心情激動，一度用波衫包頭痛哭。

愛華頓上年用2,580萬鎊高價收購比圖，但呢位26歲前鋒未有表現，上季只得3個入球，今季更加1場正選都未踢過，盛傳愛華頓將會喺1月放走佢，消息祖雲達斯可能提出借用。比圖賽後解釋爆喊原因：「呢球對我意義重大，因為就算我冇得落場，我都一直好努力咁去練波，過去呢段日子好難捱，但我終於可以用入波幫到球隊，所以我好激動。」