肉酸！曼聯𢱑坐「順風機」被曼城狠拒

曼聯新老闆拉特克利夫上場後，不斷進行開源節流措施，之前嘅大裁員、取消費格遜大使職務，都引起唔少爭議。最近曼聯連租私人飛機嘅錢都想慳，竟然向死敵曼城𢱑坐「順風機」，要求對方載埋明奈、阿歷真度加拿祖去巴黎出席金球獎頒獎禮，結果遭到狠拒。

金球獎頒獎禮星期一(28日)喺巴黎舉行，曼聯有明奈同加拿祖候選KOPA獎(U21金球獎)，不過據英國《每日郵報》報道，曼聯認為專登租私人飛機接載兩個球員，唔合符經濟效益，所以問同城死敵曼城可唔可以畀兩人一齊坐「順風機」。

曼聯嘅要求最後受到拒絕，原因唔係曼城「小器」，而係因為曼城有多達8個球員要出席頒獎禮，包括洛迪卡斯簡迪、艾寧夏蘭特在內5名男子隊員，加上另外3名曼城女子隊球員，乘客數字已經爆滿。曼聯如意算盤打唔響，仲要連架都丟埋。