施維斯達「加盟」艾納斯　同C朗重逢

曾效力曼聯同阿仙奴嘅法國球星施維斯達，日前宣布「加盟」沙特勁旅艾納斯，已經47歲嘅佢唔係擔任教練或高層，而係負責為新成立嘅「艾納斯電視台」工作，有望同昔日曼聯隊友C朗拿度做專訪。

艾納斯新開設嘅電視頻道，係球會嘅官方電視台，將會報道艾納斯日常新聞同球員專訪等等，而且請到施維斯達加入，呢位法國守將喺1999年至2008年效力曼聯，同C朗做過幾年隊友。

不過，施維斯達日前接受訪問，就「倒米」叫C朗要去美職：「如果C朗可以喺美職同美斯交鋒，會係所有球迷嘅夢想，不過我知佢喺沙特好開心，亦係沙特嘅Icon，而且佢仲喺葡萄牙國家隊。或者到世界盃之後，佢會考慮足球生涯最後一次轉會。」