尼日利亞罷踢「有理」　獲判贏3比0

尼日利亞今個月中非國外作客利比亞，因飛機被迫降落喺一個廢棄機場，令全隊職、球員喺冇水、冇食物、冇wifi情況下，滯留超過15小時，最後尼日利亞決定罷踢。非洲足協周六(26日)宣布，尼日利亞獲判贏3比0，拎到寶貴3分。

非洲足協紀律委員會周六聆訊，表明主場嘅利比亞有義務合理接待客隊，包括安排巴士接載球員，所以判利比亞輸0比3，並且罰款5萬美元。利比亞足總投訴，指佢哋喺同一個國際賽期先作客尼日利亞，同樣因主隊安排不當，令佢哋航班大幅延遲，喺比賽前幾個鐘頭先着陸。有傳聞指利比亞足總故意「玩嘢」報復，結果搞出大頭佛。