祖普莫亭拒返史篤城　等英超聘約

喀麥隆前鋒祖普莫亭今夏同拜仁慕尼黑約滿後，一直未有落班，有傳聞指英冠球隊史篤城曾向佢斟介，但被呢位35歲前鋒拒絕，因為佢希望可以加盟英超球會。

祖普莫亭喺17/18球季曾效力當時踢英超嘅史篤城，但全季只入5球，被視為「水貨」踢走，估唔到佢之後踢到風生水起，先後效力巴黎聖日耳門同拜仁慕尼黑兩大豪門，拎過5次聯賽冠軍同喺歐聯入唔少重要入球。喀麥隆媒體報道，史篤城有意簽番祖普莫亭，但就受到拒絕。

德國著名記者Plettenberg報道：「祖普莫亭冇打算退休，佢想繼續比賽，之前已經拒絕巴西同杜拜球會嘅斟介，祖普莫亭目前繼續保持個人操練，等緊合適嘅球會出現。」報道指祖普莫亭希望加盟英超球會，意甲嘅拖連奴亦曾表示興趣。