達洛治射門空世紀失機　曼聯錄最敗家數據

曼聯喺英超又輸1場，作客韋斯咸再次贏攻勢輸波，佢哋上半場本來可以入幾球，但一眾球員連環失機，最離譜係達洛治扭過門將面對空門射高，進一名鞏固曼聯今季英超「最敗家」球隊地位。

上半場32分鐘，達洛治接應般奴費南迪斯長傳突破越位，剔過埋出迎嘅門將法比安斯基，點知最後一射面對空門竟然抽高。曼聯領隊坦哈格賽後表示：「我哋上半場踢得好好，製造好多機會，有6至7個100%嘅入球機會未能把握，講真除咗把握力，我冇乜嘢可以批評。捉達洛治出嚟鬧係唔公平，阿歷真度加拿度、海倫、拉舒福特、般奴費南迪斯都有失機。」

曼聯今季9場聯賽只入8球，全英超只有水晶宮同修咸頓(各入6球)更少。據Opta數據顯示，曼聯今季聯賽xG(預期入波)係14.6球，但最終只有8個入波，-6.6球落差係今季各隊之冠，成為今季英超最敗家球隊。