訊號？沙維囝囝着曼聯波衫　魔迷好興奮

曼聯喺英超輸畀韋斯咸後，近8場比賽只得1勝，英超排緊第14位，領隊坦哈格帥位岌岌可危。盛傳係曼聯新帥目標嘅沙維，日前被影到同着住曼聯波衫嘅囝囝一齊玩卡，被球迷視為最大「訊號」！

坦哈格帶領嘅曼聯不斷沉淪，傳聞球會已秘密同沙維進行接觸，就喺呢個風頭火勢時間，沙維老婆Nuria Cunillera就喺社交網出Story，影住沙維同一對仔女玩《寵物小精靈》遊戲卡，不過重點係沙維囝囝係着住曼聯波衫，沙維老婆喺呢個時間發布咁嘅影片，唔知係有心定無意啦！

事實上，沙維較早前接受《泰晤士報》訪問，已表明有意去英超執教：「我會好開心去呢度(英超)教波，所有人都話我知英超好正、好適合工作，所有人都好熱情、為比賽要活，球場氣氛一流，喺英超執教絕對係我希望擁有嘅經歷。」