雲佬接手紅魔大熱　魯賓艾摩廉隨時跑出

坦哈格敗走，邊個接任自然成為下一個話題。歐洲博彩公司即時賠率顯示，看守領隊「雲佬」雲尼斯達萊成為3.5倍大熱，事實上，今年夏天雲佬未上任助教之前，已經盛傳佢本身會頂替坦哈格個位，如果嚟緊幾場佢教得好，坐正都好正常。

至於次熱門係4倍嘅士砵亭教頭魯賓艾摩廉。魯賓艾摩廉曾經同韋斯咸、利物浦都扯上關係，最終未有英超球會搵佢，依家成為接手曼聯嘅熱門人選之一，唯一麻煩係，魯賓艾摩廉同士砵亭合約入面，有1,280萬鎊解約條款，紅魔鬼願唔願意畀咁大舊錢係一大疑問。

待業嘅修夫基、沙維同賓福特主帥法蘭克，順序係第3至第5熱門。當中沙維近日成為魔粉極度盼望嘅對象，因為盛傳曼聯派出4人組去西班牙同佢接觸，炒熱咗呢名前巴塞教練加盟嘅傳聞。

下任曼聯領隊賠率

雲尼斯達萊 3.5倍

魯賓艾摩廉 4倍

修夫基 4.5倍

沙維 6倍

法蘭克 6倍

卡域克 8倍