金球奖闹剧！洛迪压云尼封王 皇马杯葛抗议
2024年10月29日 08:00
东网电视
更多新闻短片
洛迪卡斯简迪首夺金球奖。
金球奖颁奖礼爆出闹剧！曼城及西班牙中场洛迪卡斯简迪，周二(29日)凌晨喺巴黎勇夺球员个人最高殊荣金球奖，不过大热倒灶嘅皇家马德里前锋云尼斯奥斯祖利亚，唔单止拒绝出席典礼，就连皇马全体代表都玩杯葛以示抗议，被球迷批评“输唔起”。
颁奖礼前普遍认定金球奖系云尼斯奥斯囊中物，《马卡报》指皇马电视台预备5个钟头进行直播，云尼斯奥斯亦喺巴黎Book咗个50人会场搞庆功，赞助商都准备将店铺油上金色庆祝，但颁奖礼前几个钟头全部取消，皇马内部指引“金球奖已不存在”，包括会长皮里兹同得奖者安察洛堤、基利安麦巴比等，全体皇马代表都唔会出席，因为佢哋已得悉洛迪先系得奖者。
结果协助西班牙赢得欧国杯嘅中场洛迪，力压云尼斯奥斯同祖迪比宁咸首夺金球奖。养紧伤嘅佢撑住拐杖，喺非洲传奇韦亚手上接过奖座后表示：“今日对我、我屋企人同我嘅国家，都系好特别嘅日子。我要多谢女朋友，今日系我哋纪念日。曼城系世上最好球队，呢个奖系西班牙足球嘅胜利，唔系属于我一个。”
洛迪得奖后，云尼斯奥斯喺社交网留言：“如果有需要，我会再踢好10倍，佢哋未准备好。”传媒引述皇马发言人批评赛会：“如果云尼斯奥斯唔系冠军，咁喺相同情况下，得奖者应该系丹尼尔卡华积，但结果唔系，好明显金球奖同欧洲足协唔尊重皇马，皇马唔会去唔受到尊重嘅地方。”
皇马喺今次颁奖礼入面获选为“最佳男子球队”，安察洛堤当选“最佳教练”，基利安麦巴比就同哈利卡尼并列“最佳前锋”(梅拿奖)，不过所有人都冇去领奖。西班牙国家队主帅富安迪亦表示：“皇马咁重要嘅球会唔出席金球奖，对足球嚟讲唔系一件好事。”唔少网民就炮轰皇马“输打赢要”，往年C朗同美斯激斗年代，佢哋就算输都会出席，云尼斯奥斯系“输唔起”。
2024金球奖前10名
1 洛迪卡斯简迪(曼城)
2 云尼斯奥斯祖利亚(皇家马德里)
3 祖迪比宁咸(皇家马德里)
4 丹尼尔卡华积(皇家马德里)
5 艾宁夏兰特(曼城)
6 基利安麦巴比(皇家马德里)
7 拿达路马天尼斯(国际米兰)
8 拉明耶马(巴塞隆拿)
9 却奥斯(皇家马德里*已退休)
10 哈利卡尼(拜仁慕尼黑)