曼聯支付違約金　魯賓艾摩廉勢成紅魔新帥

曼聯周一(28日)解僱領隊坦哈格後，新帥人選火速敲定！據Fabrizio Romano、《The Athletic》等權威消息來源報道，曼聯已同葡萄牙教頭魯賓艾摩廉進行斟介，而且同意向士砵亭支付1,000萬歐元「贖身費」要人，雙方正就個人合約條款談判，預計短期內可以拍板。

曼聯炒坦哈格魷魚後，助教雲尼斯達萊會出任看守領隊，領軍出戰周四(31日)凌晨英聯盃對李斯特城，不過下周一(4日)迎戰車路士可能已有新帥登場，《The Athletic》率先爆料：「曼聯準備支付魯賓艾摩廉合約內嘅1,000萬歐元贖身費，兩間球會(曼聯及士砵亭)進入最後協商。」

39歲嘅魯賓艾摩廉被譽為歐洲最佳年輕教練之一，佢執教士砵亭4年半以來，幫球隊拎過2次葡超冠軍同2次葡聯盃冠軍，而且以鍾意提拔新人見稱。魯賓艾摩廉周二(29日)出席士砵亭記者，對傳聞絕口不提：「我預咗你哋(記者)會問(執教曼聯)，不過我冇嘢講，唔會為未來作任何評論，我好榮幸做士砵亭教練。」