橫掃3大獎項　西班牙成金球大贏家

今屆金球獎頒獎禮，西班牙成為最大贏家，除洛迪卡斯簡迪勇奪金球獎外，新星拉明耶馬亦勇奪「U21金球獎」(KOPA獎)，女足球星邦瑪迪就贏得女子金球獎。

17歲新星耶馬今夏協助西班牙贏歐國盃冠軍，喺KOPA獎力壓皇馬嘅艾達古拿同曼聯中場明奈封王，洛迪隨後獲頒金球獎後，亦喺感言入面鼓勵耶馬：「我深信耶馬喺不久將來就會拎金球獎，繼續努力、加倍努力，你會做得到！」

女足獎項亦係西班牙球員天下，效力巴塞隆拿女足嘅邦瑪迪大熱贏得女子金球獎，連續2年「封后」，呢位26歲中場上季帶領巴塞隆拿女足做「4冠王」，佢得獎後表示：「好榮幸連續兩年得獎，我一直話呢個獎唔係一個人可以得到，我有幸有一班好隊友，幫助我成為更好嘅球員。」