横扫3大奖项　西班牙成金球大赢家

今届金球奖颁奖礼，西班牙成为最大赢家，除洛迪卡斯简迪勇夺金球奖外，新星拉明耶马亦勇夺“U21金球奖”(KOPA奖)，女足球星邦玛迪就赢得女子金球奖。

17岁新星耶马今夏协助西班牙赢欧国杯冠军，喺KOPA奖力压皇马嘅艾达古拿同曼联中场明奈封王，洛迪随后获颁金球奖后，亦喺感言入面鼓励耶马：“我深信耶马喺不久将来就会拎金球奖，继续努力、加倍努力，你会做得到！”

女足奖项亦系西班牙球员天下，效力巴塞隆拿女足嘅邦玛迪大热赢得女子金球奖，连续2年“封后”，呢位26岁中场上季带领巴塞隆拿女足做“4冠王”，佢得奖后表示：“好荣幸连续两年得奖，我一直话呢个奖唔系一个人可以得到，我有幸有一班好队友，帮助我成为更好嘅球员。”