坦哈格急返荷蘭　兩大「仇人」齊抽水

荷蘭教頭坦哈格周一(28日)被曼聯炒魷，佢朝早收到通知後，晏晝就Book私人飛機返荷蘭屋企休息，坐車離開卡寧頓訓練基地嗰陣，更縮低頭避開記者鏡頭，似乎唔想被影到潦倒一幕。坦哈格兩大「仇人」迪基亞同皮爾斯摩根，更忍唔住出嚟抽水。

依家效力費倫天拿嘅迪基亞，上年獲英超「金手套獎」後，突被坦哈格沒收已開出嘅合約無情踢走。喺坦哈格被炒後，迪基亞喺社交網留下神秘手勢emoji，雖然個手勢有唔同解讀，但普遍認為帶有「歡樂」意思，唔少網民留言都話係慶祝坦哈格落台。

相比起迪基亞嘅隱晦，英國名嘴皮爾斯摩根就直接攻擊，呢位C朗老友連環發文，包括同C朗「飲勝」，甚至回應坦哈格早前反C朗嘅言論：「明年5月再睇下我哋喺邊？」皮爾斯摩根抵死留言：「答案出現，佢排緊隊拎失業救濟金。」