坦哈格急返荷兰　两大“仇人”齐抽水

荷兰教头坦哈格周一(28日)被曼联炒鱿，佢朝早收到通知后，晏昼就Book私人飞机返荷兰屋企休息，坐车离开卡宁顿训练基地嗰阵，更缩低头避开记者镜头，似乎唔想被影到潦倒一幕。坦哈格两大“仇人”迪基亚同皮尔斯摩根，更忍唔住出嚟抽水。

依家效力费伦天拿嘅迪基亚，上年获英超“金手套奖”后，突被坦哈格没收已开出嘅合约无情踢走。喺坦哈格被炒后，迪基亚喺社交网留下神秘手势emoji，虽然个手势有唔同解读，但普遍认为带有“欢乐”意思，唔少网民留言都话系庆祝坦哈格落台。

相比起迪基亚嘅隐晦，英国名嘴皮尔斯摩根就直接攻击，呢位C朗老友连环发文，包括同C朗“饮胜”，甚至回应坦哈格早前反C朗嘅言论：“明年5月再睇下我哋喺边？”皮尔斯摩根抵死留言：“答案出现，佢排紧队拎失业救济金。”