雲佬拒絕長教曼聯　唔想「出賣」坦哈格

曼聯宣布炒坦哈格魷魚後，助教雲尼斯達萊獲安排擔任臨時領隊。據英國《曼徹斯特晚報》報道，曼聯曾經諮詢過「雲佬」正式做曼聯領隊嘅可能性，不過呢位名宿就作出拒絕，因為唔想被認為係「出賣」好友坦哈格嘅黑手。

雲尼斯達萊今個夏天加入曼聯教練團，外界一直認為係為「接班」坦哈格做準備，不過消息指「雲佬」係由坦哈格引入幫手，兩人關係友好。「雲佬」依家雖然答應出任臨時領隊，但就無意正式坐正，以免被覺得「篤死」坦哈格後搶飯碗。

盛傳曼聯即將聘請葡萄牙教頭魯賓艾摩廉執教，報道指魯賓艾摩廉亦會帶埋自己「班底」加入，令雲尼斯達萊等原有教練團處境尷尬，之後會唔會獲得留用仍然係未知之數。