加拿祖「造反」　表明最想同洛迪合作

曼聯翼鋒阿歷真度加拿祖有份入選今屆金球獎KOPA獎(U21金球獎)提名名單，頒獎禮開始之前，呢位20歲阿根廷國腳被傳媒問到，最想同邊位金球獎候選人合作，佢毫不避忌話係曼城中場洛迪卡斯簡迪，惹起「造反」疑雲，似乎仲嫌曼聯未夠亂。

金球獎候選人球星如雲，包括祖迪比寧咸、基利安麥巴比、拉明耶馬等，但阿歷真度加拿祖偏偏話最想同紅魔鬼宿敵曼城球員洛迪卡斯簡迪合作，引起唔少紅魔球迷不滿。特別係曼城早前拒絕畀明奈同加拿祖坐「順風機」去巴黎出席頒獎禮，但加拿祖仍然「最欣賞」洛迪，被指冇骨氣、映衰曼聯。

不過，亦有人認為阿歷真度加拿祖最熟悉洛迪卡斯簡迪，加上2人都係出身於馬體會青年軍，所以支持呢位「師兄」。另外，加拿祖認為歷年來最值得贏金球獎，但卻同獎項無緣嘅球員係尼馬、基沙文、恩尼斯達。