【官宣】巴洛迪利加盟熱拿亞做「廉價勞工」

意甲球隊熱拿亞正式宣布，簽入自由身球員巴洛迪利，呢位「失業」近半年嘅34歲意大利前鋒終於可以重返球場比賽。不過，「巴神」僅獲得8個月短約，如果交唔出表現，明夏一樣冇得留低。

巴洛迪利今夏離開土耳其球隊阿達納鐵路後，雖然傳出唔少球會想簽佢，但都不了了之，直至最近熱拿亞出手，先至見到曙光，皆因熱拿亞教練基拿甸奴非常欣賞「巴神」，認為佢可以提升球隊攻力，最終達成協議，雙方簽約至2025年6月，佢將會着最喜歡嘅45號球衣。不過，巴洛迪利合約總薪酬僅40萬歐元(約336萬港元)，成為「廉價勞工」。

巴洛迪利曾經效力國際米蘭、曼城、利物浦、AC米蘭、尼斯、馬賽等多間球會，佢今次重返意甲能否重生，大家拭目以待。