新帥都有嫡系　曼聯要簽埋呢位射手

坦哈格執教曼聯期間簽入大批阿積士嫡系，依家點收科仲未知，據報魯賓艾摩廉都有自己嫡系，曼聯搵佢執教，隨時又要使錢簽新兵，目標人物就係士砵亭當家射手、瑞典國腳基奧基尼斯。

基奧基尼斯現年26歲，之前踢過史雲斯同高雲地利等英冠球隊，對英格蘭球壇唔陌生，佢上季轉投士砵亭，轉會費2,000萬歐元(約1.68億港元)，依家睇番係超值收購，事關佢加盟士砵亭首季就為球隊射入43球，今季上陣14場已經交出14球4助攻，包括歐聯上陣3場入2球，正好解決曼聯進攻乏力問題。

由於基奧基尼斯表現出色，已經受到各大豪門關注，其身價亦直線上升，據估計市值升到7,000萬歐元(約5.88億港元)，魯賓艾摩廉如果想帶埋佢過檔，明年初冬窗重開，曼聯又要使多一大筆。