新帅都有嫡系　曼联要签埋呢位射手

坦哈格执教曼联期间签入大批阿积士嫡系，依家点收科仲未知，据报鲁宾艾摩廉都有自己嫡系，曼联搵佢执教，随时又要使钱签新兵，目标人物就系士砵亭当家射手、瑞典国脚基奥基尼斯。

基奥基尼斯现年26岁，之前踢过史云斯同高云地利等英冠球队，对英格兰球坛唔陌生，佢上季转投士砵亭，转会费2,000万欧元(约1.68亿港元)，依家睇番系超值收购，事关佢加盟士砵亭首季就为球队射入43球，今季上阵14场已经交出14球4助攻，包括欧联上阵3场入2球，正好解决曼联进攻乏力问题。

由于基奥基尼斯表现出色，已经受到各大豪门关注，其身价亦直线上升，据估计市值升到7,000万欧元(约5.88亿港元)，鲁宾艾摩廉如果想带埋佢过档，明年初冬窗重开，曼联又要使多一大笔。