費事眼冤　曼聯通知安東尼1月可離隊

曼聯辭退坦哈格後，仲有好多蘇州屎跟尾，其中最麻煩係佢嘅首席嫡系球員安東尼馬菲奧斯，據報曼聯管理層已經通知該前巴西國腳，明年1月可以離隊，但亦知道要清洗呢條友要付出好大代價。

安東尼2022年夏天由阿積士轉投曼聯，轉會費高達1億歐元，係坦哈格入主曼聯後最高價收購，可惜好快證實佢係水貨，上陣87場入12球5助攻，坦哈格今季為保住帥位已經棄用佢，但最終坦帥自己都被炒，安東尼仍然留喺曼聯。

安東尼現時周薪高達20萬鎊(約200萬港元)，合約簽到2027年，雖然阿積士、法林明高同部分英超中型班都表示興趣，但上述球隊都冇能力負擔佢人工，如果外借嘅話，曼聯將要支付大部分工資，但估計曼聯都會送走佢，費事眼冤。