费事眼冤　曼联通知安东尼1月可离队

曼联辞退坦哈格后，仲有好多苏州屎跟尾，其中最麻烦系佢嘅首席嫡系球员安东尼马菲奥斯，据报曼联管理层已经通知该前巴西国脚，明年1月可以离队，但亦知道要清洗呢条友要付出好大代价。

安东尼2022年夏天由阿积士转投曼联，转会费高达1亿欧元，系坦哈格入主曼联后最高价收购，可惜好快证实佢系水货，上阵87场入12球5助攻，坦哈格今季为保住帅位已经弃用佢，但最终坦帅自己都被炒，安东尼仍然留喺曼联。

安东尼现时周薪高达20万镑(约200万港元)，合约签到2027年，虽然阿积士、法林明高同部分英超中型班都表示兴趣，但上述球队都冇能力负担佢人工，如果外借嘅话，曼联将要支付大部分工资，但估计曼联都会送走佢，费事眼冤。