辛祖又被打入冷宮？馬利斯卡咁解釋

查頓辛祖今季被曼聯外借去車路士之後，獲得主帥馬利斯卡器重，演出亦有明顯改善，但近2場都冇上陣，令人懷疑又被打入冷宮。不過，馬利斯卡解釋話，收起呢位24歲英格蘭翼鋒，只係戰術部署，並非因為佢表現差。

查頓辛祖最近1次披甲係英超1比2不敵利物浦，車路士近2場分別歐協聯對彭拿典奈高斯、英超對紐卡素，佢都冇份上陣，難免令人懷疑佢故態復萌。

馬利斯卡被傳媒問到辛祖情況時話：「辛祖近2場冇披甲，只屬戰術需要，並冇其他問題，佢加盟以來，表現非常好，但任何球員都冇可能全季保持最佳狀態，辛祖仲有好多比賽需要踢，佢要勤力爭取表現。」

查頓辛祖近2場缺陣，車路士都贏波，代替佢正選位置嘅柏度尼圖連續2場有助攻，辛祖要搶番正選，並非易事。