加歷查獻「毒計」：曼聯應該請加利佬執教

曼聯好可能聘請士砵亭主帥魯賓艾摩廉，但利物浦名宿加歷查反而獻計，建議曼聯搵番有「紅魔DNA」嘅加利尼維利領軍。不過，眾所周知，加利佬以往教波成績非常差，難怪網民認為加歷查獻「毒計」，想令曼聯跌入深淵。

加歷查出席電視節目時，被問到邊位將會成為曼聯下一任主帥，佢話：「如果畀我揀，我會推薦加利尼維利。」此言一出，加歷查自己都忍唔住笑，兩人屬於多年歡喜冤家，除咗球員時代多次交鋒之外，擔任足球評述員後，亦喜歡互窒。加歷查今次擺明暗寸加利佬唔識教波，佢曾經執教華倫西亞4個月就被炒，成為笑柄。

加歷查亦承認推薦加利尼維利教曼聯屬於講笑，並指出紅魔鬼最好聘請沙維領軍。