利物浦「中伏」　基艾沙復出無期

利物浦今夏以1,000萬鎊(約1億港元)「超筍價」收購祖雲達斯翼鋒費達歷高基艾沙，以為執到寶，點知原來「中伏」，領隊施洛透露呢位27歲意大利國腳傷勢反覆，未知幾時可以復出。

費達歷高基艾沙加盟紅軍後，僅上陣3次，合共只踢咗77分鐘就受傷，已經缺陣超過1個月，施洛被問到基艾沙傷勢時話：「現時好難講基艾沙幾時可以復出，佢嘅情況時好時壞，有時可以操練，但跟住又受傷。」

費達歷高基艾沙效力祖雲達斯期間，曾於2年前受重傷，導致缺陣10個月，傷愈後無復當年之勇，並且不時再出現傷患問題，成為「玻璃腳」，利物浦決定簽入佢，遭到唔少聲音質疑，因為以基艾沙身體質素，難以應付英超硬朗風格，結果不幸言中。

另外，施洛表示，隊內另外2位傷兵迪亞高祖達、哈維艾利洛，應該要等到11月下旬國際賽期之後，先至有機會復出。