坦哈格極速搵到工　有望執教多蒙特

坦哈格周一(28日)被曼聯炒魷之後，可能去德甲搵食，據悉多蒙特因為成績大倒退，計劃解僱教練紐尼沙軒，並聘請坦哈格接手領軍。呢位54歲荷蘭名帥曾經擔任拜仁慕尼黑二隊教練，熟悉德國球壇環境，或者有機會翻身。

多蒙特上季獲得德甲第5位，並打入歐聯決賽，但當時主帥泰錫離任，會方請來36歲名宿紐尼沙軒接手領軍，表現令人失望，今季聯賽8戰僅4勝1和3負，早前歐聯對皇馬，原本上半場領先2球，形勢大好，但紐尼沙軒調動失誤，導致倒輸2比5。

多蒙特上輪德甲同樣領先之下，1比2不敵奧格斯堡，加上周三(30日)凌晨德國盃第2圈，戰至加時被禾夫斯堡淘汰，球會管理層開始對紐尼沙軒失去耐性，準備換帥，人選包括坦哈格。

坦哈格曾經揚言離開曼聯，就去其他球隊捧盃，外媒指佢嘅戰術風格非常適合多蒙特，因為「蜜蜂兵團」踢慣進攻足球，並且以年輕球員為骨幹，情況類似阿積士，坦哈格一旦執教多蒙特，有望重演當年為阿積士奪得聯賽冠軍嘅好戲。