熱刺破曼城不敗身　普帥「第2季捧盃」？

周四(31日)凌晨英聯盃第4圈，熱刺主場2比1淘汰半力出擊嘅曼城，打破「藍月亮」今季各項賽事不敗之身。熱刺殺入8強後將主場鬥曼聯，澳洲領隊普斯迪高路「第2季捧盃」命運有機會重演？

曼城今場收起艾寧夏蘭特等主力，熱刺趁機會搶攻，迪姆華拿同柏比沙亞早段分別入波，曼城完半場前靠馬菲奧斯紐尼斯追番球，不過兩隊下半場再冇入波，熱刺最終贏2比1晉級，送曼城今屆首場敗仗。

熱刺殺入8強後將迎戰曼聯，希望打破長達17年「冠軍荒」，普斯迪高路早前曾表示「我第2季多數有盃捧」，事實上佢之前教布里斯班獅吼、橫濱水手、澳洲國家隊同些路迪，第2季都拎到冠軍。

普斯迪高路賽後表示：「我覺得聯賽排名比盃賽冠軍更有指標性，冇人可以確保冠軍，聯賽顯示出球隊嘅成熟度，成熟球隊喺每個比賽都有機會爭冠。冠軍唔係一切，你睇下有個領隊，2年拎2冠都被炒魷。」