17歲新星又入靚波 阿仙奴3蛋贈普雷斯頓
2024年10月31日 10:01
東網電視
更多新聞短片
17歲嘅華拿利表現成熟。(Getty Images)
周四(31日)凌晨英聯盃第4圈，阿仙奴半力出擊下作客3比0大勝普雷斯頓，17歲新星華拿利擔任正選繼續有出色表現，繼上輪梅開二度後又轟入世界波，賽後獲領隊阿迪達大力讚賞。
阿仙奴今場派出大量副選，17歲中場華拿利喺上一圈首次正選即入2球，今場第2次正選依然搶鏡。加比爾捷西斯24分鐘先開紀錄，華拿利33分鐘禁區頂射門直飛上角，半場入替嘅夏維斯57分鐘入多球，助「兵工廠」輕鬆贏3比0，8強將會喺主場迎戰水晶宮。
華拿利為阿仙奴兩次踢正選入3球，領隊阿迪達賽後表示：「華拿利天份好高，有好好嘅態度同成長環境，我哋要用合適嘅節奏，按部就班咁幫佢成長。球場上佢好有膽識，球場外就同好多17歲一樣比較較安靜，你見到隊友都好願意將佢波交畀佢，我哋有一粒好好嘅寶石，我好開心。」