高爾彭馬坐足全場　車路士出局馬帥無悔

英格蘭國腳高爾彭馬對車路士有幾重要？周四(31日)凌晨英聯盃第4圈，車路士喺高爾彭馬坐足全場下，作客慘吞紐卡素2蛋，不過領隊馬利斯卡就話球隊表現唔差，無悔收起高爾彭馬。

車路士今場繼續派出「明星B隊」，不過祖奧菲歷斯、尼干古、梅迪歷組成嘅鋒線表現麻麻，紐卡素憑阿歷山大伊沙克23分鐘入波，加上阿素迪沙斯26分鐘烏龍波，順利以2比0贏波。

高爾彭馬今場有份做後備，但落後都冇被換入場，領隊馬利斯卡解釋：「如果只係睇表現，今場輪換好成功，只係個比數唔成功，車路士因為10分鐘失準就輸波。唔用高爾彭馬係正確決定，因為我哋有尼干古同祖奧菲歷斯，擺佢(高爾彭馬)做後備係以防萬一，不過尼干古同祖奧菲歷斯都踢得好，唔需要用到高爾彭馬。」