曼城連傷3星　哥迪奧拿：9年最嚴重傷兵潮！

曼城周四(31日)凌晨喺英聯盃不敵熱刺出局，比輸波更慘嘅係再多3名傷兵，其中巴西翼鋒沙維奧被擔架抬出場，更一度流下男兒淚，領隊哥迪奧拿表示球隊正經歷9年來最嚴重嘅「傷兵潮」。

曼城本身已有洛迪卡斯簡迪、奇雲迪布尼、基亞利殊、基爾獲加同謝利美杜古受傷，今場作客熱刺前，文路爾艾簡治又喺賽前熱身受傷，半場再有魯賓迪亞斯因傷被換，63分鐘輪到沙維奧右腳足踝嚴重扭傷，要瞓擔架床喊住咁走，隊友都紛紛向佢送安慰。

哥迪奧拿賽後表示：「聽日得返2個龍門同艾寧夏蘭特操練，其他都唔得。我哋有13個傷兵，出現好大麻煩，過去9年我從未遇過咁嚴重嘅傷兵問題。喺呢個情況下，所有球員都要行前一步，球隊前所未有咁團結。」