【有片】洛迪踩多腳　改歌詞寸爆雲尼斯奧斯

曼城中場洛迪卡斯簡迪日前勇奪金球獎，落敗喺皇家馬德里前鋒雲尼斯奧斯祖利亞，因不滿結果而同一眾皇馬代表齊齊杯葛頒獎禮。

西班牙傳媒爆料，西班牙國腳洛迪喺領獎嗰陣表現大方，不過慶功宴就露出「真面目」。曼城社交網分享佢哋喺巴黎一間餐廳舉行慶功宴片段，見到洛迪、魯賓迪亞斯等球員興奮慶祝，但西班牙《El Chiringuito》就曝光被「河蟹」嘅影片，片中洛迪手上揮舞餐巾，唱住意大利名曲《Bella Ciao》，但就將歌詞入面「Bella」換成「雲尼斯奧斯」，意思係「Bye Bye 雲尼斯奧斯」，非常寸嘴。

洛迪唱歌寸爆雲尼斯奧斯影片：https://twitter.com/i/status/1851402080600117536　

其實28歲嘅洛迪一向「寸嘴」，今夏為西班牙贏歐國盃冠軍後，佢喺巡遊派對嗰陣又係唱歌惹禍，喺台上唱：「直布羅陀屬於西班牙、直布羅陀屬於西班牙。」結果被直布羅陀足總投訴，搞到被歐洲足協罰停賽1場。