曼聯新兵烏加迪　啱晒艾摩廉

魯賓艾摩廉空降曼聯，據報會催促管理層簽入士砵亭前中後3線主力，不過遠水難救近火，球員交易需要時間，最快都要1月冬窗重開先到，曼聯現有人腳中，原來早就有艾摩廉嫡系成員，佢就係季初簽入嘅烏拉圭國腳文路爾烏加迪。

文踏爾烏加迪曾在艾摩廉執教下嘅士砵亭效力兩季，其後以6,000萬歐元轉投巴黎聖日耳門，今季再以4,200萬鎊加盟曼聯，亦係曼聯今季其中一項重磅收購，不過佢喺坦哈格麾下並未獲得重用，各項賽事僅上陣8場，包括4場英超，對上一場正選係歐霸盃對費倫巴治。

英國傳媒報道，坦哈格原本最希望留用蘇夫恩岩拉伯特，據經紀消息稱，簽入烏加迪並非坦哈格主意，亦同坦哈格嘅戰術體系格格不入，更似是曼聯管理層嘅主意。

烏加迪曾與艾摩廉合作奪得2021至22年葡超冠軍，兩季上陣86場入1球，屬於艾摩廉戰術體系成員，艾摩廉即將降臨，在眾多紅魔兵當中，最先受惠嘅肯定係烏加迪。