傳謝拉特將被炒魷　球迷怒轟「一無是處」

沙特阿拉伯豪門伊蒂法克今季成績低迷，日前喺沙特盃被次級聯賽球隊踢出局後，盛傳領隊謝拉特將會被炒魷，伊蒂法克球迷亦紛紛表示支持，批評謝拉特做教練係「一無是處」。

謝拉特執教伊蒂法克16個月，雖然有穆沙迪比利、韋拿杜姆等球星，不過成績麻麻，目前聯賽只排第10位，盃賽又被低組別球隊淘汰，沙特媒體指伊蒂法克考慮解僱呢位年薪達1,520萬鎊嘅領隊。

沙特電視台評論員、球迷齊齊炮轟謝拉特，其中有網上被熱傳留言指：「我由2001年開始支持伊蒂法克，謝拉特肯定係最差教練，冇戰術、冇激勵、乜都冇，就連記者會都做唔好，我想知佢當年喺維拉點生存？」

謝拉特早前喺記者會自爆，佢會更改伊蒂法克練波時間，方便佢睇利物浦比賽直播，言論引嚟各界炮轟。謝拉特2年前教維拉幾乎降班而被炒魷，維拉之後聘請艾美利，依家已經喺歐聯排榜首，表現脫胎換骨。