安素宣布同「網紅」女友分手　原因勁騎呢

車路士中場安素費南迪斯今季表現差勁，喺隊中地位受到動搖，球場以外亦麻煩多多，為安素生咗一對仔女嘅Valentina Cervantes宣布，兩人已經決定分開。阿根廷記者報道，今次分手係安素嘅決定，因為佢想嘗試「單身生活」。

細細個就跟住安素去葡萄牙、英格蘭踢波嘅「網紅」Valentina，喺IG向佢140萬個粉絲宣布分手消息：「我同安素已經分開，不過我哋仍然係一家人，會互相支持，因為兩個細路好需要我哋嘅愛，我心目中安素係個好爸爸，當中冇任何『戰爭』，大家唔需要去製造。」

阿根廷記者爆料，指今次分開係安素嘅主意：「安素同家人講，佢希望自己一個人生活，佢好細個已經選擇組織家庭同做爸爸，佢希望經歷番之前放棄咗嘅單身生活。」依家只係23歲嘅安素，同Valentina自小認識兼拍拖，雖然未正式結婚，但已組織家庭，安素啱啱20歲嗰陣就榮升爸爸，細仔上個月先1歲生日，估唔到安素依家先覺得「未玩夠」。