西班牙洪災2場西甲延期　皇馬捐100萬歐元賑災

西班牙東部華倫西亞市近日遭遇特大洪雨襲擊，各區地浸嚴重，造成過百人命傷亡，唔少建築物被洪水沖毀，高速公路、橋樑亦倒塌，電力、鐵路和高速公路服務都受到影響。西班牙足總周四(30日)宣布，華倫西亞市所有賽事延期，當中包括華倫西亞對皇家馬德里、維拉利爾對華歷簡奴兩場西甲聯賽。

皇馬亦宣布，同紅十字會聯合發起救災行動，皇馬率先捐出100萬歐元去幫助受洪災影響嘅家庭。唔少西班牙國腳都向洪災死難者表示哀悼，效力巴塞隆拿嘅費倫托利斯表示：「見到我嘅家鄉被洪水摧殘，我個心真係碎晒，我知道冇嘢可以安慰到，但我仍然想鼓勵所有災民，加油！」

皇馬原定喺星期日(3日)凌晨作客華倫西亞，依家可以提早準備下周三(6日)作客AC米蘭嘅歐聯大戰。