阿仙奴落重本搶人才　青年軍讀最貴私校

阿仙奴青訓近年出產唔少人才，由布卡約沙卡、伊美路維到近期上位嘅17歲新星華拿利都好高質，據英國《每日郵報》爆料，原來阿仙奴為搶有潛質新人，會安排新人入讀倫敦最頂尖私人學校，每年學費高達17,500鎊(約17.5萬港元)。

今季被提拔上一隊嘅華拿利，依家喺St John's Senior School讀書，呢間號稱倫敦最頂尖嘅私校，擁有世界盃標準嘅足球場，上年會考有70%科目獲得「9-7」高評級，學費每年17,500鎊。報道指華拿利年初拒絕曼城挖角而續約，阿仙奴嘅足球同學業安排就係重要原因。

報道指，華拿利喺學校嘅15歲「師弟」基蘭湯臣，最初效力韋斯咸青年軍，阿仙奴夏天就用110萬鎊向韋斯咸「收購」，並且幫佢安排入讀St John's Senior School。學校發言人表示：「如果阿仙奴要喺英國其他地區招攬青年軍，佢哋會話可以安排免費嚟St John讀書，阿仙奴提供嘅學習條件係重要因素。」