阿仙奴落重本抢人才　青年军读最贵私校

阿仙奴青训近年出产唔少人才，由布卡约沙卡、伊美路维到近期上位嘅17岁新星华拿利都好高质，据英国《每日邮报》爆料，原来阿仙奴为抢有潜质新人，会安排新人入读伦敦最顶尖私人学校，每年学费高达17,500镑(约17.5万港元)。

今季被提拔上一队嘅华拿利，依家喺St John's Senior School读书，呢间号称伦敦最顶尖嘅私校，拥有世界杯标准嘅足球场，上年会考有70%科目获得“9-7”高评级，学费每年17,500镑。报道指华拿利年初拒绝曼城挖角而续约，阿仙奴嘅足球同学业安排就系重要原因。

报道指，华拿利喺学校嘅15岁“师弟”基兰汤臣，最初效力韦斯咸青年军，阿仙奴夏天就用110万镑向韦斯咸“收购”，并且帮佢安排入读St John's Senior School。学校发言人表示：“如果阿仙奴要喺英国其他地区招揽青年军，佢哋会话可以安排免费嚟St John读书，阿仙奴提供嘅学习条件系重要因素。”