艾摩廉入“魔”倒数　率士砵亭霸气大胜

周五(1日)官宣将成为曼联新帅嘅鲁宾艾摩廉，周六(2日)凌晨最后一次喺葡超主场带领士砵亭作赛，5比1大破艾马多拉尽展霸气，艾摩廉亦不断飞吻同球迷告别。盛传会跟随艾摩廉加盟曼联嘅基奥基尼斯，今场食出“大四喜”光芒四射，呢位瑞典前锋亦表示乐意挑战高水平联赛。

艾摩廉喺月中上任曼联领队前，仲会带士砵亭踢多3场，迎战阿马多拉系第1场告别派对，大批球迷拉起横额送别。士砵亭未受艾摩廉离队消息影响，基奥基尼斯上半场已大演帽子戏法，半场领先3比1。换边后基奥基尼斯再入1球，加上麦斯阿拿奥祖尾段埋斋，最终5比1大胜，今季联赛10战全胜排榜首。

艾摩廉赛后解释离队决定：“我被告知如果依家唔答应(教曼联)，可能以后都冇机会，我有3日时间去决定，呢个选择系会改变我一生，但我唔想将来后悔冇踏出呢一步。我最关心嘅系唔想士砵亭受到伤害，呢方面以后再睇，我喺曼联都会继续关心士砵亭。”

艾摩廉其中一个“关心”对象，好可能系瑞典前锋基奥基尼斯，盛传曼联想罗致一名“高产”射手，今季10场联赛入16球嘅基奥基尼斯就系合适人选，佢合约内有1亿欧元买断条款，但买断费去到明年夏天就会下降，佢赛后表示：“好伤心见到艾摩廉离开，但我哋会继续做好本份。我唔知(将来跟艾摩廉加盟曼联)，你见到我依家踢得好开心。”

26岁嘅基奥基尼斯曾效力白礼顿、史云斯同高云地利等英格兰球会，上年获艾摩廉引入士砵亭，成功大爆发全季狂入43球，盛传阿仙奴同车路士都对佢有兴趣，佢早前亦表态乐意重返英国：“我喺士砵亭冇任何投诉，当然我嘅目标系要挑战更高水平赛事，士砵亭开嘅转会费确实太高，但球会觉得我值呢个价，我都会尊重。”