【英超】傷兵困擾作客求穩 阿仙奴打鵲靠細心
2024年11月02日 15:05
東網電視
更多新聞短片
今晚英超頭場，紐卡素主場硬撼阿仙奴。「兵工廠」今季受傷兵問題困擾，作客往往踢穩陣波，造訪出名難踢嘅聖占士公園球場，預計大部分時間會進行激烈中場爭奪，入球唔慌多，2.5球入球細抵玩。（Now 621及611周六晚8時30分直播）
阿仙奴今季有唔少主力受傷，中場馬田奧迪加特嘅缺陣打擊最大，令球隊進攻創造力銳減。不過「兵工廠」勝在防守硬淨，尤其祖利安添巴復出後，兩閘更加穩陣，中堅威廉沙列巴今場停賽期滿復出，有佢在陣嘅防線畀到人信心。
事實上，阿仙奴季初多次喺惡劣情況下轉打守勢波，而且效果唔錯，包括10人應戰下作客和曼城，開季造訪阿士東維拉同熱刺兩大勁旅，分別靠守贏2比0同1比0，今季4場聯賽作客3次開2球或以下，相當實而不華，今場作客會照辦煮碗。
紐卡素今季成績跌Watt，近5場聯賽2和3負未贏過，周中英聯盃派主力出擊贏車路士，但球員未必回到氣，體能有一定影響，惟有寄望憑主場聲勢搶奪中場。「喜鵲」近5次主場對阿仙奴，總入球全開2球或以下，再追入球細。
更多賠率：