曼聯冬季預算榨乾　艾摩廉保證：1月唔搞士砵亭

曼聯今夏用超過2億鎊增兵後，開季發覺「唔對路」將坦哈格炒魷，新帥魯賓艾摩廉上場理應大展拳腳，不過據《The Athletic》報道，曼聯斥巨資換帥位，冬季預算已經榨乾，而艾摩廉亦向士砵亭保證，1月轉會窗唔會向「舊東家」挖角。

曼聯炒坦哈格賠咗1,500萬鎊，向士砵亭撬走艾摩廉同教練團隊又花超過1,000萬鎊，《The Athletic》記者Mark Critchley透露：「曼聯換帥使咗好多錢，考慮到球會連續5年蝕錢，加上夏天又使咗2億鎊，曼聯1月份唔會有咩搞作，事實上曼聯喺1月份通常都好靜，對上一次冬季大手筆已經係4年前簽般奴費南迪斯，艾摩廉要等到夏天先會有重要資金去重建。」

艾摩廉似乎亦知道資金有限，證實離隊後向士砵亭保證，1月轉會窗唔會返轉頭挖角：「我喺1月份唔會打任何士砵亭球員主意。」傳聞士砵亭前鋒基哥基尼斯、中堅奧士文尼迪奧文迪，都係曼聯收購目標之一。