哈利卡尼2射1傳　重奪射手榜一哥

周六(2日)晚德甲，拜仁慕尼黑主場以3比0大勝柏林聯，前鋒哈利卡尼射入2球及1次助攻，呢位上季德甲及歐洲金靴獎得主今季聯賽已有11球進帳，反超前法蘭克福前鋒馬莫殊，重奪射手榜一哥位置。

拜仁慕尼黑繼上輪聯賽大勝波琴5球，以及上場德國盃贈緬恩斯4蛋後，今場又大開殺戒，開賽14分鐘米高奧利斯博到12碼，哈利卡尼主射入網打開紀錄。上半場尾段，哈利卡尼傳畀京士利高文射成2比0，呢位法國翼鋒連續6次對柏林聯，都取得入球。

換邊之後，京士利高文投桃報李，頭槌二傳畀哈利卡尼射入奠定勝局。由於第2位RB萊比錫作客以1比2不敵多蒙特，榜首拜仁慕尼黑成功拉開領先優勢至3分，拜仁將於嚟緊周四(7日)凌晨歐聯主場對賓菲加。

另外，第3位法蘭克福雖然以7比2大勝波琴，但首席射手馬莫殊只有1球進帳，今季聯賽累積入10球，被哈利卡尼搶走射手榜榜首。