祖雲達斯又靠「03後」救駕　創意甲紀錄

周日(3日)凌晨意甲祖雲達斯作客以2比0擊敗烏甸尼斯，打破各項賽事連續3場不勝悶局，繼19歲中場基倫耶迪斯早前對國際米蘭梅開二度後，21歲後衞沙禾拿今場亦入波，令祖雲達斯成為今季意甲唯一一支有2位「03後」球員累積入到2球嘅球隊。

祖雲達斯上輪歐聯不敵史特加，近2場聯賽分別打和國際米蘭及帕爾馬，今場對烏甸尼斯，打開紀錄1球帶有幸運成份，卡夫蘭杜林喺禁區左路窄角度起腳，省中遠柱彈出，再撞到門將奧基爾反彈入網，官方計奧基爾擺烏龍。

烏甸尼斯曾經有1次入波黃金機會，基倫戴維斯近門勁射，被門將迪基哥里奧飛身撲出。戰至37分鐘，基倫耶迪斯射門中柱彈出，右閘沙禾拿補射入網，亦呢位意大利新星繼8月對維羅納入波後，今季第2個聯賽入波，令祖記有2位出生於2003年或之後嘅球員今季聯賽有2球進帳，球隊年輕化取得重大進展。

另1場意甲，AC米蘭作客以1比0擊敗蒙沙，中場雷恩達斯頂入全場唯一入波，呢位26歲荷蘭國腳近2次上陣入3球，腳風非常順。