曼聯「屠夫」又甩難　馬利斯卡：明顯紅牌！

曼聯中堅利辛度馬天尼斯踢法兇狠，唔少攔截都非常踩界，周一(4日)凌晨對車路士又嚟料，完場前施展「收山腳」踩向高爾彭馬膝頭，但球證只出示黃牌。車路士領隊馬利斯卡賽後炮轟，指犯規屬「明顯紅牌」，而曼聯名宿堅尼同加利尼維利亦「幫理不幫親」，指馬天尼斯走甩紅牌夠晒運。

今場補時階段，馬天尼斯飛鏟踢中高爾彭馬左腳膝頭，球證只係出示黃牌，雖然VAR曾介入檢查係咪紅牌犯規，但最終冇要求球證改判。馬利斯卡賽後不滿話：「我認為馬天尼斯並冇意圖去搶波，而且個犯規動作非常危險，好明顯係要紅牌。」

曼聯名宿加利仔亦同意：「你踢到咁高，就等如申請紅牌，佢好好彩，呢腳應該要紅牌。」堅尼就話：「馬天尼斯唔高興畀高爾彭馬玩，呢腳攔截好嗱渣，雖然踢得唔係好應，如果被罰紅牌都冇得投訴。」外號「屠夫」嘅馬天尼斯，9月對水晶宮曾跳起用雙腳飛踢對手，當時走甩紅牌已引起唔少爭議。