曼联“屠夫”又甩难　马利斯卡：明显红牌！

曼联中坚利辛度马天尼斯踢法凶狠，唔少拦截都非常踩界，周一(4日)凌晨对车路士又嚟料，完场前施展“收山脚”踩向高尔彭马膝头，但球证只出示黄牌。车路士领队马利斯卡赛后炮轰，指犯规属“明显红牌”，而曼联名宿坚尼同加利尼维利亦“帮理不帮亲”，指马天尼斯走甩红牌够晒运。

今场补时阶段，马天尼斯飞铲踢中高尔彭马左脚膝头，球证只系出示黄牌，虽然VAR曾介入检查系咪红牌犯规，但最终冇要求球证改判。马利斯卡赛后不满话：“我认为马天尼斯并冇意图去抢波，而且个犯规动作非常危险，好明显系要红牌。”

曼联名宿加利仔亦同意：“你踢到咁高，就等如申请红牌，佢好好彩，呢脚应该要红牌。”坚尼就话：“马天尼斯唔高兴畀高尔彭马玩，呢脚拦截好嗱渣，虽然踢得唔系好应，如果被罚红牌都冇得投诉。”外号“屠夫”嘅马天尼斯，9月对水晶宫曾跳起用双脚飞踢对手，当时走甩红牌已引起唔少争议。