孫興民不滿被換狂爆粗　普帥咁樣解釋

熱刺喺周日(3日)英超主場4比1大破阿士東維拉，不過傷愈復出嘅隊長孫興民，下半場早段因不滿被換離場，返到後備席瘋狂爆粗發洩，領隊普斯迪高路賽後解釋，換走「老孫」係為佢身體着想，怕佢傷完再傷。

熱刺上半場落後0比1，換邊後4分鐘，因傷抖咗3場嘅孫興民就交出助攻，畀比蘭莊臣射入追平，點知7分鐘後就被李察利臣入替。孫興民當時見到換人牌係自己個號碼，一臉難以置信，返到後備席更罕見失控，不斷爆粗發洩。不過事實證明呢個調動奏效，熱刺尾段由蘇蘭基梅開二度，加上占士麥迪臣錦上添花，大勝4比1完場。

普斯迪高路賽後解釋：「因為佢之前嘅受傷，今場一定唔會踢得耐。孫興民上次復出，踢咗60分鐘就疲態畢露，所以今場無論戰況係點，佢都唔會踢多過55分鐘，幸運嘅係佢離場前交出精彩助攻。冇球員鍾意被換走，我唔需要同佢傾呢個問題，未來仲有好多戰鬥需要佢。」