格連活特轟入致勝球　效率媲美「巴神」

周一(4日)凌晨法甲，格連活特重拾水準，轟入致勝1球，協助馬賽作客以2比1擊敗南特，加上摩納哥早前輸波，馬賽升上第2位，逼近榜首巴黎聖日耳門(PSG)，保持爭標希望。

馬賽上輪法甲慘吞巴黎聖日耳門3蛋，格連活特表現嚴重失準，踢完上半場被換走，成為「戰犯」。呢位23歲英格蘭翼鋒知恥近乎勇，今仗大踢爭氣波，開賽初段個人突破後勁射，僅被門將拿方特撲出。

馬賽繼續強攻對手，踢到24分鐘，莊拿芬路維左路傳中，馬奧比飛剷入網打開紀錄。南特傾力反擊，由前鋒卡迪韋尼射入扳平。

換邊之後，格連活特個人表演，喺禁區頂射入靚波，為馬賽全取3分，現時落後榜首巴黎聖日耳門6分。

格連活特今季首10場法甲射入7球，成為21世紀以來，入球效率第2高嘅馬賽球員，僅次於2019年巴洛迪利首9場法甲入7球。