加利尼維利批評曼聯買人：近10年只簽啱1個

曼聯自費格遜退休後，戰績一沉不起，其中球員買賣係最受詬病一環，名宿加利尼維利日前警告新任領隊魯賓艾摩廉，想「留低」就要解決呢個問題，因為曼聯過去10年「只係買啱一個球員」。

加利仔表示：「艾摩廉要令球員發揮到最好，曼聯近10年簽咗好多搶手球員，但加盟之後踢得勁差，點解？可能係教練問題、可能係球員問題、可能係環境問題，但如果艾摩廉搞唔掂，佢只會重蹈覆轍。過去10年嘅收購，我只係諗到般奴費南迪斯一個係對辦，10年使咗18億鎊買人，般費之外我一個都數唔到！」

曼聯過去10年，用高價簽過保羅普巴、盧卡古、米希達利恩、阿歷斯山齊士、查頓辛祖、哈利馬古尼、C朗拿度、雲迪碧克、安東尼馬菲奧斯、卡斯米路、華拉尼等頂級球星，但大部份都令球迷失望。